ក្រុម FC Barcelona បានព្យាយាមវាយសម្រុកខ្លាំងមែនទែនក្នុងការប្រកួតទល់ក្រុម Lyon កាលពីយប់មិញ ប៉ុន្តែលទ្ធផលបានត្រឹមតែ០-០ ប៉ុណ្ណោះក្នុងពានរង្វាន់ UEFA Champions League ជើងទី១ វគ្គ១៦ក្រុមចុងក្រោយ។
ក្នុងការប្រកួតយប់មិញ ក្រុម Barca ស៊ុតដល់ទៅ២៥ជើងឯណោះ ប៉ុន្តែមិនអាចទម្លាយសំណាញ់ទីក្រុម Lyon បានទេ។ ផ្ទុយទៅវិញ សឹងតែរបូតគ្រាប់បាល់ខ្លួនឯងវិញទៅហើយ ដោយMartin Terrier ស៊ុត១ជើងបុករបាទី។ ក្រុមកំពូលតារាងនៅ La Liga បានសរសើរទៅលើអ្នកចាំទី Anthony Lopes របស់ក្រុម Lyon ខ្លាំងមែនទែន ដែលអាចសង្គ្រោះបាល់បានច្រើនពីជើងរបស់ Messi និង Suarez ។
ស្មើយប់មិញនេះដែរ ក៏បានធ្វើឱ្យក្រុម Barcelona មានកំណត់ត្រាមិនល្អឡើយក្នុងពានរង្វាន់ Champions League លេងក្រៅដី។ ពោលគឺ៦ប្រកួតកន្លងមកនេះ ពួកគេមិនទាន់ស្គាល់ពាក្យឈ្នះឡើយ ដោយបានត្រឹមស្មើ២ និងចាញ់៤ដងឯ ណោះ។ មួយវិញទៀតលទ្ធផលគ្មានគ្រាប់បាល់នេះទៀតសោត នឹងធ្វើឱ្យពួកគេត្រូវតែរកគ្រាប់បាល់ឱ្យបាននៅជើងទី២ ដែលលេងនៅដីខ្លួនឯង នៅថ្ងៃទី១៣ខែមីនាខាងមុខ៕ប្រភព៖ Dailymail