ខ្សែការពារ Bellerin របស់ Arsenal អាចអវត្តមានដល់ចប់រដូវកាល ដោយសារតែរងរបួសជង្គង់ធ្ងន់ធ្ងរ ក្នុងការប្រកួតដែលយកឈ្នះលើក្រុម Chelsea ២-០។
ខ្សែការពារស្លាបស្ដាំខាងលើនេះ ទើបតែជាសះស្បើយពីរបួសកំភួនជើងទេ ហើយក៏បានចូលលេងជាមួយក្រុម Chelsea កន្លងទៅ រងរបួសជាថ្មីម្ដងទៀត ដោយលើកនេះប៉ះពាល់ជង្គង់ម្ដង។ ការប៉ះទង្គិចជង្គង់នេះដែរ ត្រូវបានក្រុមគ្រូពេទ្យខាង Arsenal បញ្ជាក់ថាធ្ងន់ធ្ងរ ហើយអាចនឹងឈានដល់ការវះកាត់ថែមទៀត។ ប្រសិនណាបើវះកាត់មែន នោះខ្សែការពារសញ្ជាតិអេស្ប៉ាញម្នាក់នេះអាចនឹងអវត្តមានរហូតដល់ចប់រដូវកាលនេះតែម្ដង។
លោក Unai Emery អ្នកចាត់ការក្រុម Arsenal បាននិយាយចំពោះរបួសនេះដែរថាប្រសិនណាបើ Bellerin ពិតជាត្រូវវះកាត់មែន នោះរូបគេអាចនឹងអវត្តមាន៦ទៅ៩ខែឯណោះ។ វាជាការពិបាកសម្រាប់ក្រុមកាំភ្លើងធំ នៅពេលខ្វះខ្សែការពារស្លាបល្អម្នាក់ដើម្បីជួយនៅតំបន់ខាងលើ។ ខណៈដែលក្លឹបបច្ចុប្បន្នក៏មិនមានបំណងចង់ទិញកីឡាករបន្ថែមទៀតដែរនោះ៕ប្រភពDailyMail
